ILOILO – Nagpasalig ang Police Regional Office (PRO) VI nga imbestigaran sang pamunuan ang asud-asud nga pagpangluthang-patay sa banwa sang Tubungan, Iloilo.
Sa interview sang Bombo Radyo kay Police Lt. Col. Gilbert Gorero, acting public information officer (PIO) sang PRO-VI, iya ginpahayag nga magatukod ang Iloilo Police Provincial Office (IPPO) sang special investigation task group agud padalman pa ang pagpangusisa kaangot sa insidente.
Matandaan nga subong nga bulan sang Hunyo, ginpatay si Police Master Sgt. Arnel Paurillo, 42 anyos, sa Brgy. Teniente Benito, Tubungan, Iloilo kag ginsundan man sang pagpangluthang kanday Glenn Bunda, 24 anyos, Sangguniang Kabataan chairman sang Brgy. Tagpuan kag Harold Tablazon, 33 anyos, Barangay Kagawad sang Brgy. Ago sa nasambit nga banwa.
Suno kay Gorero, ginasunod gid sang otoridad ang due process ukon insakto nga proseso sang imbestigasyon.
Liwat man nga ginpanginwala sang natungdan ang alegasyon sang New People’s Army (NPA) nga grupo sang kapulisan ang may kahimuan sang pagpatay kaanday Bunda kag Tablazon.
Samtang, ginatutukan man sang Philippine Army ang seguridad sang mga pumuluyo partikular na sa banwa sang Tubungan kun sa diin madata ang aktibidad sang NPA.
Sa interview sang Bombo Radyo kay Lt. Col. Joel Benedict Batara, commander sang 61st Infantry Battalion sang Philippine Army, iya ginhingyo ang bulig sang mga pumuluyo kag local government units (LGUs) agud mapatuman ang kampanya batok sa nagapadayon nga kalakasan sang rebelde nga grupo.
Nagapangabay ang opisyal nga kun may yara sang ginasuspetsuhan nga mga persona sa isa ka lugar, gilayon ini nga i-report sa otoridad.
