Nagpanawagan ang prosecution panel sa publiko nga lantawon gid mismo ang nagakatabo sa impeachment trial ni Vice President Sara Duterte kag indi lang magsalig sa kun ano ang makit-an nga gina-post nga mga videos nga kun ka-isa kulang sa konteksto.

Sa interview sang Bombo Radyo kay Atty. Benjamin “Jay” Tolosa Jr., House legal spokesperson kag private prosecutor, iya ginpahayag nga may yara sang edited videos nga nagapatalang lang sa publiko.

Ini nga videos nga nagapalapta sang sala nga impormasyon amo ang rason suno sa iya nga nagakadulaan sang interes ang mga Pilipino sa proceedings.

Nagpahanumdom ini sa mga pumuluyo nga maghalong gid sa sini nga mga sahi sang content.

“Lagi din naming hinihikayat ang mga kababayan natin na hangga’t maaari panoorin nila mismo ang paglilitis na nangyayari at hindi umasa sa mga clips lang. Kadalasan pa na makikita nila ay edited at spliced na hindi nagbibigay ng tamang impormasyon tungkol sa impeachment proceedings,” suno kay Tolosa.

Matandaan nga sang damlag lang, gin-ulan sang pagpakamalaot ang video nga gin-post ni Senator-Judge Pia Cayetano kun sa diin gin-utod ang sabat kag paathag ni Prosecutor kag Rep. Chel Diokno. May gin-file nga ethics complaint batok sa iya, apang tubtub subong, wala sang paathag nga ginpagwa ang senadora.

Sa bahin sang prosecution, nauna na nga gin-anunsyo nga nagapangita sila sang bag-o nga legal spokesperson para nga matapna ang mga misinformation sa impeachment trial.

Nahibaluan nga duha ang ginatungdan nga papel ni Tolosa, apang ginapahayag nga kinahanglan na sini nga magtutok sa preparasyon sa presentasyon sang witnesses.

Nauna naman nga gin-anunsyo nga partikular nga ginapangita sang prosecution panel ang isa man ka abogado nga nakahangop sang courtroom developments kag makapaathag sang ila nga legal significance sa mga tumalan-aw samtang ginasigurado man nga indi makompromiso ang pending proceedings.

“Talagang pinagsisikapan namin na siguraduhin na mapaalam sa ating mga kababayan kung ano ang totoong nangyayari sa paglilitis na’to,” pahayag sang House legal spokesperson.