ILOILO CITY – Ginplastar sang Public Safety and Transportation Management Office kun ano ang pagpatuman sang Traffic Discipline Zone sa Sen. Beningno Aquino Jr. Avenue, Mandurriao, Iloilo City.
Ini ang kasunod sang pagsinapol sang Enero 3 nga ginpatawag sang nasambit nga ahensya kaupod ang Land Transportation Office, Regional Highway Patrol Group kag Philippine National Police.
Sa interview sang Bombo Radyo kay Riza Otayde, tagpamaba sang Land Transportation Office 6, iya ginpahayag nga may yara sang specific area kun sa diin ipahamtang ang loading kag unloading zone lakip man ang mga traffic sign nga magapahanumdom sa mga motorista.
Suno kay Otayde, magabuligay ang apat ka ahensya sa pagpatuman sang Traffic Discipline Zone, 24/7 sa 14-kilometer nga Diversion Road sa diin pagagamiton ang tanan nga resources may kaangtanan sa pagpatuman sang traffic rules and regulations kasubong sang breath analyzer.
Ginpahayag ni Otayde nga sa bug-os nga Diversion Road, ipatuman ang tanan nga traffic laws and ordinances kun sa diin ang tagsa ka violation ang may nagakaigo nga penalty.
Samtang, ipatuman naman gilayon sang Land Transportation Office ang Driver’s Academy agud nga maid-id kun sin-o lang ang nagakadapat nga hatagan sang
lisensya.
Kun basehan ang road accidents suno kay Otayde, kalabanan sa mga rason amo ang human error rason nga kinahanglan nga ipaidalom sa examination kag training ang mga naga-apply sang driver’s license.
Wala pa man sang petsa kun san-o umpisahan ang Driver’s Academy apang suno sa natungdan, may yara na sang Memorandum halin sa Central Office nga ipatuman ini sa labing madali nga tion.
