Gin-athag sang Public Safety and Transportation Management Office (PSTMO) nga sundon sini ang mandu ni Iloilo City Mayor Jerry Treñas nga mahimo gihapon makapang-kumpiskar sang driver’s license ang mga traffic aides apisar pa baliskad diri ang legal opinion nga ginpaguwa sang Department of Justice.
Sa ginsapubliko nga opinyon ni Justice Secretary Jesus Crispin Remulla, ginpahayag nga ang local government units ang wala sang otoridad nga mag-confiscate sang driver’s licenses sang salawayon nga mga motorista.
Apang sa interview sang Bombo Radyo kay Mr. Jeck Conlu, head sang PSTMO, iya ginpahayag nga ang desisyon sang local government ang nakasandig sa existing ordinance ukon sa Regulation Ordinance No. 338 nga gin-aprubahan sang konseho kag ginhatagan sang otoridad ang traffic aides nga magkumpiskar sang driver’s licenses.
Ang amo nga ordinansa ang ginkwestyon anay sa korte apang sang Mayo 2017, nagdesisyon ang Regional Trial Court – Branch 26 nga ang Transportation Management and Traffic Regulation Office nga amo ang daan nga pangalan sang PSTMO ang mahimo makakumpiskar sang driver’s licenses kun may paglapas ang mga motorista.
Ginsulit man sini ang pahayag sang alkalde nga ang opinyon sang DOJ kag mangin sang Department of the Interior and Local Government ang indi mahimo maka-supersede sa ordinansa nga aprubado sang Iloilo City Council.
Suno kay Conlu, gina-update man ang traffic enforcers sa syudad sa sini nga panindugan sang local governnment unit agud nga may isabat pananglitan mag-reklamo ang mga driver sa dalan kun sila ang kuhaan sang lisensya.
Pananglitan may mga driver gid nga mag-puis kag indi magpati sa traffic aides, ipalab-ot sa pulis ang reklamo suno kay Conlu kag mahimo man nga may i-file nga complaint (para sa worst case scenario). #
