Maga-deploy sang dugang nga tawo ang Public Safety and Transportation Management Office (PSTMO) sa Senator Benigno Aquino Jr. Avenue, Mandurriao, Iloilo City.
Sa interview sang Bombo Radyo Iloilo kay Mr Jeck Conlu, PSTMO head, iya ginpahayag nga ini ang isa sa mga solusyon nga nadihon sa ila pagsinapol upod kay Engr. Rodney Gustilo sang Iloilo City District Engineering Office kasunod sang kamatayon sang mag-asawa nga Joe Marie kag Alnie Osano nga nabungguan sang Mazda MX5 sports car.
Suno kay Gustilo, ang i-deploy nga dugang nga personnel sa Benigno Aquino Jr. Avenue ang magaduty umpisa alas 5 sa aga, nga mas temprano sa 6:30 sa aga nga regular nga shifting sang mga personnel sang PSTMO.
Magluwas diri,ginpahayag ni Conlu nga ila man naistoryahan ang pagdugang sang mga reflectorized signages, pagpasirado sang mga delikado nga U-turn slots, pagbuhin sang pedestrian lanes, kag pagbutang sang railings sa mga islands sa bilog nga stretch sang Senator Benigno Aquino Jr. Avenue agud malikawan ang pag-jaywalking sang mga pedestrian.
