ILOILO CITY- Mas nagbug-at pa ang mga ebidensya nga magatum-ok sa pulis nga nadakpan sa drug buybust operation sa Brgy. North Fundidor Molo, Iloilo City.
Ini matapos nga nagpositibo sa drug test ang arestado nga si PSSgt Igmedio Cristobal Jr, 40, kag residente sang Brgy. Jereos, Lapaz, Iloilo City.
Sa interview sang Bombo Radyo kay PLtCol Arnel Solis, spokesperson sang Police Regional Office (PRO) 6, iya ginpahayag nga naggwa ang positive result sa presensiya sang methamphetamine sang ginpaidalom sa drug test si Cristobal.
Suno kay Solis, gamiton ini sa kaso kriminal kag administratibo nga ipasaka batok sa amo nga pulis.
Nahibaluan nga si Cristobal ang myembro sang Regional Personnel Holding and Accounting Unit (RPHAU),
Sa nasambit nga operasyon, nakuha sa iya ang masobra P374,000 nga balor sang ginapatihan illegal nga droga.
Ginkaakig sang National Police Commission (NAPOLCOM) ang paghigko ni PSSgt Igmedio Cristobal Jr. sa imahe sang Philippine National Police(PNP).
Sa interview sang Bombo Radyo kay Atty. Joseph Celis, director sang NAPOLCOM Region 6, iya gintawag si Cristobal nga wala sang pulos kag wala sang rason agud magtinir ini sa serbisyo.
Suno kay Celis, ang kaso ni Cristobal ang itugyan na lang nila sa PNP nga nagahimo naman sang nagakaigo nga tikang batok sa amo nga pulis.
