Gin-athag sang Punong Barangay sang Brgy. Rizal Pala Pala II, Iloilo City nga mabudlay para sa ila pumuluyo ang pagkuha sang tubig nga gina-eject sang Metro Pacific Iloilo Water ukon MIWD para sa ila barangay.
Sa interview sang Bombo Radyo kay Punong Barangay Judy Navales sang Brgy. Rizal Pala Pala II, Iloilo City, iya ginpahayag nga kinahanglan pa nga mag-sag-ob sang tubig sang ila pumuluyo sa higad sang dalan bangud indi ini makalab-ot sa ila bangud tuman ka suludlon ang ila barangay.
Ginpahayag man niya nga kalabanan sa mga pumuluyo nagamato-mato na lamang sag-ub ukon nagapasag-ob kag kinahanglan pa nila nga magbayad sang lima ka peso sa kada isa ka container.
Pahayag sini nga gina propose na sang ila council ang pagpatakod sang linya sang tubig halin sa Metro Pacific Iloilo Water para makalab-ot gid ang tubod sang tubig sa tanan nga pumuluyo agud indi na sila mabudlayan sa pag-sag-ob.
Nahibaluan nga may yara na ang barangay sang duwa ka static tank nga gin hatag sang Iloilo City General Services Office kag may ara naman sila sang tangke nga nagaserbe bilang drum nga nagasalod sang tubig ulan
Ang amo nga tangke ang temporaryo nga ginagamit sang mga pumuluyo kung indi sila makasag-ub bangud sa kalauyon sang ila ginakuhaan.
