Ginpanindugan ni Retired Supreme Court Chief Justice Reynato Puno nga ang probisyon sang 1987 Constitution angot sa numero sang boto agud mag-convict sa isa ka impeachable officer ang makabig nga flexible ukon pwede bag-uhon, depende sa pila ka mga factors.
Suno kay Puno, wala nagakaigo nga hatagan sang literal nga kahulugan ang Article 11, Section 3(6) sang Constitution bangud mangin fixed kag immutable ang threshold sang 16 ka mga senador agud mag-convict.
Angot ini sa pamangkot sa senate impeachment court nga ang phrase nga “all members of the Senate” sa Article 11, Section 3, Paragraph 6 sang Constitution ang dapat magtumod sa full membership nga 24 ka mga senador.
Ginpunto man ni Puno nga ang fraction ang gin-gamit sa diin ang nasaad amo nga two-thirds sang tanan nga myembro sang Senado.
Paathag niya, paagi sa paggamit sang two-thirds, ang numero sang boto agud mag- convict ang kinahanglan nga maghulag man depende sa pila ka mga factors.
Gindugang pa ni Puno nga ang “strict, standalone, literal interpretation” sang probisyon ang mahimo magresulta sa inhustisya nga magalapas naman sa katuyuan gid sang Konstitusyon.
