Dako gid ang epekto sang nagapadayun nga Power Crisis sa mga gagmay nga negosyante sa siudad sang Iloilo.
Ini ang ginpakigbahin ni Engr. Terence Uygongco, President sang Filipino Chinese Chamber of Commerce of Iloilo, Inc., subong nga padayun sa gihapon nga maeksperyensyahan ang rotational brownouts sa bug-os nga Visayas.
Sa interview sang Bombo Radyo kay Uygongco, iya ginpahayag nga mga Micro, Small, and Medium Enterprises ukon MSME gid ang may dako nga kapierdihan ilabi na nga kalabanan sa mga ini ang indi makapadayun sang negosyo kun wala sang kuryente.
Suno sa iya, dako man tani ang mabulig sang generator sa tion sang brownout, apang dako man ang epekto sang naga-amat-amat liwat nga nagasaka nga presyo sang mga produktong petrolyo.
Ginpakigbahin man niya nga kabahin man sa mga apektado amo ang mga indibidwal nga work-from-home set-up.
Sa subong, wala pa sang natipon nga datos ang organisasyon kun pila na ang nangin kapierdihan sang mga negosyante, apang ginpahayag niya nga klaro nga may ara gid sang dako ini nga halit sa gamit kag palangabuhian sang publiko.
Nagpanawagan man si Uygungco sa mga concerned agencies, ilabi na sa Deparment of Energy (DOE) kun ano ang ila recovery plan may kaangtanan sa ginakabig dako nga problema sang mga negosyante.
