Nagapati si Iloilo Governor Arthur Defensor, Jr. nga indi pa ini ang husto nga tion agud mag-untat sang pagsuksok sang face mask ang mga residente sa probinsya sang Iloilo apisar nga yara na sa Alert Level One status.
Ini sa pihak sang nangin desisyon sang Cebu Province nga optional na lang ang pagsuksok sang face mask sa outside settings sa amo nga probinsya apisar nga yara ini sa idalom sang Alert Level II kun sa diin mas hugot pa kuntani ang restrictions.
Sa interview sang Bombo Radyo kay Defensor, iya ginpahayag nga pabor siya sa nangin pahayag sang Department of Health (DOH) nga tubtob pa sa katapusan sang tuig ang mandatory nga pagsuksok sang face mask.
Ginapanindugan sang gobernador nga yara pa sa gihapon ang pamahog sang Covid-19 rason nga indi dapat magkumpyansa ang mga pumuluyo kag dapat gihapon nga tumanon ang minimum health protocols.
Sa Hunyo 15 nga record sang Iloilo Provincial Health Office, nakasaad nga may siyam ka bag-o nga kaso sang Covid-19 sa probinsya kun sa diin duha ang napagkit sa Concepcion kag tag-isa sa Oton, Dumangas, Pototan, Badiangan, Janiuay, Cabatuan, kag Igbaras.
