Napaslawan ang mga otoridad nga makuha ang subject sang ila search warrant sa ginpatigayon nga raid sa balay sang anay bise alkalde kag subong presidente sang Liga ng mga Barangay President sa Sara Iloilo.
Sa interview sang Bombo Radyo kay Police Captain Ascencion Ortizo, hepe sang Sara Municipal Police Station, iya ginpahayag nga mismo ang Iloilo Police Provincial Office (IPPO) ang nagpagwa sang search warrant batok kay Punong Barangay Neptali Salcedo Jr alyas Wangyu sang Barangay Ardemil, Sara Iloilo.
Suno kay Ortizo, gilayon nila nga ginpadulungan ang isa sa mga gina istaran nga balay sang anay bise alkalde sa Barangay Anoring, Sara Iloilo.
Lakip sa subject sang search warrant amo ang caliber 45 kag isa ka armalite rifle.
Wala naman si Wangyu sa lugar sang ginpatigayon ang raid.
Ginakuhaan naman sang video ni Sara Mayor Ermelita Salcedo ang mga otoridad sang ginpatigayon ang raid.
Nahibaluan nga si Wangyu ang anak ni Sara Mayor Neptali Salcedo nga isa ka wanted kag ni incumbent Mayor Ermelita Salcedo.
