ILOILO CITY- Wala sang katupong nga kalipay ang nabatyagan sang isa sa mga topnotchers sa June 2023 Licensure Examination for Physical Therapists.
Sa interview sang Bombo Radyo kay Shayne Minasalbas sang Brgy. Constancia, San Lorenzo, Guimaras kag nagtapos sang degree nga Bachelor of Science in Physical Therapy sa Iloilo Doctors’ College, iya ginpahayag nga ginhandom lang niya nga makapasar apang wala niya gindumdom nga labaw pa diri ang ginhatag sang Diyos sa iya matapos nag-rank #2 sa nasambit nga eksaminasyon.
Suno kay Minasalbas, bag-o nagkuha sang board exam, nagbisita ini sa walo ka mga simbahan sa syudad sang Iloilo bilang tradisyon sang iya nga pamilya sa tion nga magkuha sang board exam.
Gin-ako naman sini nga ang handom niya sang una amo nga sudlon ang industriya sang pagpalayag apang suno sa iya, may rason ang Diyos kun ngaa ginbutang siya sa amo nga propesyon.
Nahibaluan nga naggradwar si Minasalbas sa Constancia Elementary School bilang isa sa top students; Junior High School bilang valedictorian kag Senior High School with Highest Honors sa Dr. Catalino Gallego Nava Memorial High School;kag sa kolehiyo bilang Magna Cumlaude.
