Ipasaka na subong nga semana ang kaso batok sa recruitment agencies nga involved sa pag-hire kay Jullebee Ranara, ang Filipino domestic worker nga brutal nga ginpatay sa Kuwait.
Suno kay Department of Migrant Workers (DMW) Undersecretary Bernard Olalia, napaslawan ang ahensya nga imonitor sang maayo ang status ni Ranara samtang yara sa luwas sang pungsod.
Ginpahayag pa ni Olalia nga may meeting ang government officials kaupod sa representatives sang local recruitment agencies nga naga-manage sang household service workers nga ginapadala sa Gulf State.
Ginkondenar naman sang Minister of Foreign Affairs of Kuwait nga si Sheikh Salem Abdullah Al-Jaber Al-Sabah ang pagpatay sa biktima.
Suno kay Philippine Charge d’ Affaires to Kuwait Jose A. Cabrera III, nagpalab-ot sang simpatiya ang opisyal kag nagpasalig nga pasabton ang suspek sa krimen sini nga nahimo.
Ang suspek sa krimen amo ang 17-anyos nga anak sang employer ni Ranara nga yara na subong sa kustodiya sang pulis.
Matandaan nga ginsunog ang lawas sang biktima kag ginbilin sa disyerto sa amo nga pungsod.
