Bilang kabahin sang pag-obserbar sang World Blood Donor Day subong nga adlaw, Hunyo 14, magapatigayon ang Philippine Red Cross- Iloilo Chapter sang bloodletting activity sa SM City sa Mandurriao, Iloilo City.
Maga-umpisa ini 10:00 sa aga tubtub 3:00 sa hapon.
Ang tema sang selebrasyon subong nga tuig amo ang “Donating blood is an act of solidarity. Join the effort and save lives.
Sa interview sang Bombo Radyo kay Dr. Catherine De Asis-Javellana, medical officer sang Red Cross-Iloilo, iya ginpahayag nga mahimo man nga maka-walk in sa opisina sang Red Cross ang iban pa nga interesado nga blood donors.
Kinahanglan ang dugo suno sa natungdan bangud sa nagasaka nga numero sang dengue cases sa probinsya. Makasalbar man ini sang kabuhi sang mga pasyente nga nagakinahanglan sang operasyon amo man sang mga biktima sang aksidente sa mga dalanon.
Suno naman kay Leanne Jurisprudencia, donor recruitment officer sang Red Cross – Iloilo, dalayawon man ang pagbulig sang mga banwa sa probinsya bangud may yara sang monthly (ukon quarterly man) nga pagpatigayon sang bloodletting activity.
Lantawon pa suno sa natungdan kun mapadayon ini sang mga banwa bangud pila sa mga LGUs ang dumalahan na sang lain nga administrasyon.
