ILOILO CITY – Gin-indict sang prosecutors sang Department of Justice si suspended Representative Arnulfo “Arnie” Teves, Jr. sa tatlo ka counts sang murder may kaangtanan sa pagpatay sa tatlo ka mga indibidwal sa Negros Oriental sang 2019.
Suno kay Justice Secretary Jesus Crispin “Boying” Remulla, ang murder charges ang iga-file sa Manila court subong nga adlaw ukon bwas, Agosto 12.
Ang desisyon sang Department of Justice ang nag-ugat sa kaso nga ginpasaka sang Criminal Investigation and Detection Group – Regional Field Unit National Capital Region batuk kanday Teves, Hannah Mae Sumerano ukon mas kilala nga Hannah Mae, Richard Cuadra ukon Boy Cuadra, Jasper Tanasan ukon Bobong Tanasan, Alex Mayagma, Rolando Pinili alyas Inday, kag Gemuel Hobro ukon alyas Hobro bangud sa ila partisipasyon sa mga krimen.
Ang mga biktima sa krimen amo sanday:
1. Michael Dungog, anay board member sang Third District of Negros Oriental, nga ginluthang sang Marso 25, 2019 sa atubang sang Siliman Medical Center sa Dumaguete City;
2. Lester Bato, alyas Tom Tom, bodyguard ni Basay Mayoralty candidate Cliff Cordova, nga ginpatay sang Mayo 26, 2019, sa Sitio Labugon, Barangay Nagbo-alao, Basay, Negros Oriental;
3. Pacito Libron, gina-alegar hitman nga na-angut kay Teves, nga ginluthang samtang nagasakay sa motorsiklo sa National Highway, Barangay Malabugas, Bayawan City.
Ang pundasyon sang reklamo ang nag-ugat sa extrajudicial confession ni Gemuel Hobro.
Sa iya confession, gin-hire siya ni Teves bilang kabahin sang iya armed group agud nga magpatay sa mga biktima.
Sa preliminary investigation, nagpabutyag si Hobro nga mapa-idalom ini sa Witness Protection Program sang Department of Justice.
Matapos ang kumprehinsibo nga evaluation sa mga complainant kag base sa ginpresentar nga ebidensya, pasakaan sang kaso sanday Teves, Sumerano, Cuadra, Tanasan, Mayagma, kag Pinili.
Si Teves ang sang damlag lang, opisyal nga gin-designate sang Anti-Terrorism Council bilang terorista upod sa iya armed group.
