ILOILO CITY – Mahimo nga ma-designate bilang isa ka terorista si suspended lawmaker Arnolfo “Arnie” Teves, Jr. bangud nga padayon ini nga wala nagapakita sa pungsod.
Sa hearing sang Senate Committee on Public Order may kaangtanan sa kamatayon ni Negros Oriental Governor Roel Degamo, ginpahayag ni Justice Secretary Jesus Crispin “Boying” Remulla nga mga aktibidad sa kamatayon sang gobernador ang covered sang anti-terror law: humalin sa recruitment, sa financing, sa pagbakal sang armas kag pag-distribute sini.
Bangud sini, ginpahayag ni Remulla nga ginalantaw nila ang pag-designate kag pagkondenar kay Teves bilang isa ka terorista pinaagi sa Court of Appeals ukon sa diin man nga gin-designate sang anti-terror council.
Dugang pa niya, sa tion nga indi pa mag-surrender si Teves, lauman nga magakitid ang iya nga alagyan.
Una na nga ginpahayag sang Department of Justice nga si Teves ang ginakabig nga isa sa mga masterminds sa pagpatay kay Degamo kag sa walo ka iban pa.
Ini ang ginpanginwala naman ni Teves.
Ang pahayag ni Remulla ang ginsuportahan naman ni Interior Secretary Benhur Abalos.
Antes ang hearing, nahisugtan sang Senate committee nga indi pagpahanugutan si Teves nga magtambong sa investigation sang panel bangud sa kakulang sang jurisdiction kag inter-parliamentary courtesy.
