ILOILO CITY – Ginpahayag ni Justice Secretary Jesus Crispin Remulla nga posible nga yara pa sa Cambodia si suspended Negros Oriental Representative Arnolfo “Arnie” Teves Jr.
Si Teves nga na-link sa kamatayon ni Negros Oriental Governor Roel Degamo, ang wala pa nakapauli sa Pilipinas bangud sang security concerns.
Una na nga ginpahayag ni Remulla nga si Teves ang nagagwa nga main mastermind sa krimen kag ginpa-anggid pa sa isa ka “executive producer” nga amo ang naggasto sa operasyon.
Una naman nga ginpanginwala ni Teves nga may kahilabtanan ini kag ang iya utod nga si former Negros Oriental Governor Pryde Henry Teves sa kamatayon ni Degamo.
Samtang, ginpahayag man ni Remulla nga nagkitaay sila ni Pryde Henry antes ang Holy Week.
Suno kay Remulla, ginatinguhaan subong ni Pryde Henry nga klaruhon ang iya pangalan sa krimen.
Wala na naghatag pa sang komento si Remulla sa pamangkot kun bala, may yara sang ebidensya ang otoridad sa kaangtanan ni Pryde Henry.
Ginpasa naman ni Pryde Henry ang iya counter-affidavit sa illegal possession of firearms, ammunition, and explosives nga ginpasaka batuk sa iya sa Department of Justice.
