Ginbasura sang appeals chamber sang International Criminal Court (ICC) ang hingyo sang gobyerno sang Pilipinas nga i-suspende ang imbestigasyon sang ICC prosecutor sa ginapahayag natabo nga extra-judicial killings sa idalom sang war on drugs sa Duterte administration.
Ginpaguwa ang desisyon inadlaw matapos nag-file ang Office of the Solicitor General (OSG) sang appeals brief nga naga-apelar sa tribunal nga baliskadon ang desisyon sini nga i-resume ang imbestigasyon sa anti-drugs campaign sang nagligad nga administrasyon.
Kun matandaan, ang gin-apelar sang OSG amo nga isuspinde ang imbestigasyon samtang padayon ang appeal; isuspinde ang authorization sang ICC nga mag-imbestigar; kag i-determine nga ang prosecution indi otorisado nga maghimo sang imbestigasyon.
Rason naman sang chamber, wala napaathag sang Philippine government ang “lack of jurisdiction” sa korte ukon mag-provide sang explanation sa implications kag scope of investigation.
“The Appeals Chamber rejects the request of the Republic of the Philippines for suspensive effect of the aforementioned decision of Pre-Trial Chamber I,” suno sa desisyon nga pirmado ni Judge Marc Perrin de Brichambaut.
Gin-athag man sang ICC nga bisan may local investigation, mahimo man makadungan ang imbestigasyon sang ICC.
“Lastly, the Appeals Chamber notes that as far as national investigations are concerned, the Philippines is in a position to continue its investigations irrespective of the ongoing proceedings before the Court,” pahayag sa desisyon.
Una na nagpaguwa sang desisyon ang chamber nga nagahingyo sa ICC Victims Participation and Reparations Section nga kolektahon kag ipasa ang representations sa interested victims and victim groups kag mag-preparar kag mag-submit. ##
