ILOILO CITY- Nalubong sang buhi ang pila ka mga tawo nga nagasakay sa tatlo ka mga bus nga natampukan sang duta sa nagluntad nga landslide sa Zone 1, Barangay Masara, Maco, Davao de Oro.
Base sa inisyal nga impormasyon, tatlo ka mga bus ang natampukan sang duta.
Suno kay Davao de Oro Provincial Information Officer Fe Maestre, ang bus ang ginapanag- iyahan sang isa ka mining company kag ang sakay amo ang nagatrabaho man sa amo nga kompaniya.
Base sa inisyal nga impormasyon, may mga na-rescue na nga survivors ang Municipal Disaster Risk Reduction and Management Office (MDRRMO) kag ang Mountain Search and Rescue team (MOSAR) sang probinsya.
Nagpatuman naman sang forced evacuation sa barangay Masara, Mainit, Tagbaros, Elizalde kag Panibasan kasunod sang insidente.
Gin-anunsyo naman sang municipal government sang Maco ang suspension of classes sa tanan nga lebel.
Nahibaluan nga sa sulod na sang pila ka adlaw nga nagabubo ang ulan sa madamo nga parte sang Mindanao nga nagresulta sa pagbaha kag landslides.
