Ginkumpirma na sang pila ka House sources nga si Isabela Rep. Bojie Dy ang magabulos kay Leyte Rep. Martin Romualdez bilang House Speaker sang 20th Congress.
Base sa naga-guluwa nga mga impormasyon, nagpakigkita naman si Romualdez sa pila ka party leaders kaangot sa himuon nga pag-ilis sang liderato sang Kamara buwas, Septyembre 17.
SIN-O SI DY?
Si Deputy Speaker Faustino “Bojie” Dy III amo ang nagapungko nga kongresista sa 6th District sang Isabela.
Nakaserbe man siya anay sa Kamara halin sang 2001 tubtub sang 2010; nakapungko man bilang gobernador sang Isabela sang 2010 tubtub 2019, kag nangin vice governor sang 2019 tubtub sini nga 2025 antes ini nagbalik sa lower chamber sang Kongreso.
Myembro siya subong sang Partido Federal ng Pilipinas (PFP) ni President Ferdinand “Bongbong” Marcos, Jr.
Magluwas sa iya, nagtuhaw man ang pangalan sang apat ka iban pa nga mga kongresista nga magabulos sa pagka-House Speaker nga amo sanday Deputy Speaker Rand Antipolo Rep. Ronaldo Puno, Cebu Rep. Duke Frasco, Navotas Rep. Toby Tiangco, kag Bacolod Rep. Albee Benitez.
PAALAM NA?
Sini nga gab-i, Septyembre 16, sang nagguwa ang pictures kag videos kun sa diin makit-an nga ginpangkuha na ang gamit halin sa opisina ni Romualdez lakip na ang iya desk nameplate.
Wala pa sang official statement halin kay Dy kag halin mismo kay Romualdez.
Kontrobersyal subong ang Kamara bangud sang mga iregularidad sa 2025 budget bangud sang ginaalegar nga budget insertions kun sa diin ginatudlo nga may papel sanday Romualdez kag Rep. Elizaldy Co sang Ako Bicol Party-list. Pareho nila ini nga gin-deny, apang nagtunog ang panawagan nga maghalin ang House leader sa posisyon.
Nabukaran man sa mga hearing sa Senado nga may mga kongresista nga nagbulsa sang kickbacks sa flood control projects kun sa diin nalakip pa si Romualdez sang nalawagan sang mag-asawa nga kontraktor nga sanday Curlee kag Sarah Discaya. Sang nag-testify na si Curlee sa Kamara pagkasunod nga adlaw, ginklaro sini nga wala siya sang direkta nga transaksyon kay Romualdez.
PAG-ILIS SANG LIDERATO
Sandig sa naga-guluwa nga impormasyon, magasapol pa ang mga partido sa Kamara buwas sa aga kaupod kay Dy antes mag-umpisa ang session.
Ginapahayag man nga magasapol naman ang ruling party nga Lakas 2:00 sa hapon kun sa diin ginalantaw nga magapaguwa sang formal announcement si Romualdez kaangot sa iya nga resignation.#
