Nagapadayon pa ang technical investigations kasunod sang ginapahayag cyberattack nga natabo sa website sang Vatican isa ka adlaw lang matapos ginpakamalaot ni Pope Francis ang invasion sang Russia sa Ukraine.
Suno sa Holy See, offline sa gihapon ang pila ka sites sa Vatican kag indi pa ma-access tubtub kagab-i.
Antes sini, nagpabutyag ang Russia sang kaakig sa komento sang Santo Papa nga naga-single out sa ginapahayag papel sang Russian ethnic minorities sa away sang Russia batok sa Ukraine.
Ang ginatumod sini amo ang pahayag ni Pope Francis nga ang pila sa “cruellest” actors sa Russian invasion indi amo ang Russian tradition kundi ang minorities kaangay sang Chechens, Buryati, kag iban pa.
Sang nangin inaccessible ang websites sang Vatican, nag-tweet gilayon si Ukrainian ambassador to the Vatican Andrii Yurash nga Russian terrorists ukon hackers ang may kahimuan.
Indi ini ang una nga tion nga gin-target sang hackers ang website sang Santo Papa.
Sang 2020, matandaan nga nadiskubrehan man sang cyber security researchers ang Chinese cyber attack sa internal computer network sang amo nga pungsod.
