ILOILO CITY- Ginapanan-aw nga amat-amat na nga magatahaw ang tensyon sa tunga sang Russia kag Ukraine kag mga kaalyado sini nga Western countries.
Ini kasunod sang report nga ginapabalik na sang Russia ang pila nila ka tropa sa military districts nga malapit sa Ukraine matapos nga nakompleto na nila ang drills.
Suno kay Bombo International Correspondent Genevive Dignadice direkta sa Russia, apisar sang pull-out, padayon gihapon ang large-scale drills sang Russian troops.
Pahayag ni Dignadice, ang iban nga exercises kaangay sang large joint Russia-Belarus drill ang nagapadayon man kag magatakop ini sa Pebrero 20.
Apisar sang ginapahayag pag-withdraw sang tropa sang Russia, ginsiling naman ni Jens Stoltenberg, Secretary General sang Ukraine, nga wala pa sila sang nakit-an nga senyales sang reduced Russian military presence sa borders sang Ukraine.
Mangin ang iban nga pungsod nga kaalyado sang Ukraine ang hugot man ang pagbantay kun matuod ang ginpahayag sang Russia nga amat-amat na gid man nga nagpull-out ang ila tropa.
Nahibaluan nga nag-abot sa Russia si German Chancellor Olaf Scholz agud makig-istorya kay President Vladimir Putin angot sa misyon nga malikawan ang giyera paagi sa pagpakig-dayalogo sa mga pungsod nga involved ilabi na ang mga myembro sang North Atlantic Treaty Organization (NATO).
