ILOILO CITY – Liwat nga gin-dismiss sang Sandiganbayan 4th Division ang civil case may kaangtanan sa ginabanta P200 billion in assets and properties sang pamilya Marcos kun sa diin, ang kalabanan diri ang na-recover na sang gobyerno, pila na ka tuig ang nakaligad.
Sa resolution nga napetsahan sang July 22, ang anti-graft court ang nag-deny sang motion for reconsideration nga gin-file sang Republic of the Philippines batuk kay Ferdinand E. Marcos, Sr.
Sa amo nga resolution nga ginpirmahan ni Division Chairperson Alex Quiroz nga may concurrence nanday Associate Justices Maria Theresa Mendoza-Arcega kag Maryann Corpus-Mañalac, wala sang nagakaigo nga ebidensya nga ginplastar ang gobyerno sang ginpatigayon ang trial agud nga ma-establish ang claim nga ang mga propedad ang yara sa gihapon sa control sang mga Marcoses.
Bangud sini, liwat nga gin-dismiss sang Sandiganbayan ang motion for reconsideration nga gin-file sang December 29, 2019.
Ang Civil Case No. 0002 ang ginalakipan sang mga assets nga na-recover pinaagi sa compromise agreements ukon sang iban pa nga related cases kaangay sang Philippine Telecommunications Investment Corporation shares, properties sa Cabuyao, Laguna; Paoay, Ilocos Norte; ang Sto. Nino Shrine and People’s Center sa Tacloban City; ang Swiss deposits; Arelma assets and properties subong man ang mga alahas kag paintings.
Sa una nga desisyon sang korte sang 2019, ang civil case ang gin-dismiss bangud sang kakulang sang ebidensya bangud nga ang kalabanan sini ang gin-photocopy nga mga dokumento.
Sa separado nga concurring opinion ni Justice Mañalac, ang rason sang dismissal sang kaso amo nga na-recover na sang gobyerno ang mga assets gani, wala na sang dapat nga resolbahon ang korte.
Sa amo man nga desisyon, gin-cite sang korte ang apat ka mga propedad nga wala pa na-recover sang gobyerno.
Ini amo ang Pandacan, Manila house; Batac Museum; kag Batac Guest House nga yara pa sa control sang mga Marcoses subong man ang property nga kabahin sang San Fabian Philippine Tourism Authority Beach Resort nga yara sa idalom sang pagdumala sang gobyerno local.
