Ginplastar ni SB Member Pyt Trimañez, chairman sang Committee on Transportation sa Sangguniang Bayan sang Pavia, ang mga problema sa dalanon sa amo nga banwa nga dapat nga hatagan sang solusyon agud nga malikawan ang dugang nga mga disgrasya.
Lakip sa mga obserbasyon amo ang nagkalapanas nga lane marker kag bike lane marker; wala sang “cat eye” ukon reflectorized gadget sa center lane; kag wala sang early warning device ukon reflector sa existing projects.
Sa interview sang Bombo Radyo kay Trimañez, iya ginpahayag paagi sa isa ka resolusyon, mangabay siya sa Department of Public Works and Highways (DPWH) Region VI agud nga sila ang makabisita sa lugar kag maka-check kun ano ang kinahanglan nga i-address.
Suno pa sa natungdan, mangabay man ang Committee on Transportation nga dugangan ang street lights sa amo nga banwa.
Nagpahanumdom man ini mangin sa pribado nga mga firms ukon sin-o man nga nagapatigayon sang ongoing project nga makig-angot gid anay sa Local Government Unit (LGU) agud masigurado nga may mga early warning devices nga ginabutang sa dalan.
May mga drainage construction suno kay Trimañez nga kulang ang ginabutang nga paandam kag huol gid ilabi na kun indi pamilyar ang motorista sa dalan sa Pavia.
Nahibaluan nga sa record sang Iloilo Police Provincial Office (IPPO), 1,383 ang na-record nga disgrasya sa dalanon sa probinsya sang Iloilo humalin sang Enero tubtob Mayo subong nga tuig. Sa sini nga mga kaso, 219 ang na-rekord sa Pavia — pinakamataas sa bilog nga probinsya sang Iloilo. ##
