ILOILO CITY- Halos 100% na nga preparado ang Santa Barbara National Comprehensive High School Sepak Takraw Boys sa nagahilapit nga 2023 Palarong Pambansa sa Hulyo 29 tubtob Agosto 5 sa Marikina City.
Sa interview sang Bombo Radyo kay Coach Rey Jagunap, iya ginpahayag nga ginalakipan sang 12 ka mga atleta kag tatlo ka trainers ang team.
Suno kay Jagunap, dako gid nga bulig nga mayoriya sang mga atleta ang lunsay residente sang Barangay Binangkilan, Sta. Barbara agud mahapos ang pagtipon sa ila para sa training.
Tuman naman ang pagpasalamat ni Jagunap sa Sta. Barbara National Comprehensive High School, local government unit kag sa tanan nga nagasuporta sa ila nga nagapabaskog sa ila determinasyon nga magdaug sa Palaro.
