Indi mahapos ang mangin seafarer — kinahanglan nga malampuwasan ang ginabatyag nga homesickness kag dalagko nga mga balod.
Sa interview sang Bombo Radyo kay Kyger John Gazo Lamasan sang Mina, Iloilo, iya ginpahayag nga pangamuyo lang gid ang iya masami armas agud nga mangin safe sa iya nga trabaho.
Indi lango-lango suno sa iya nga makabatyag sang kahidlaw sa pamilya bangud indi man siya dali-dali nga makapauli kag pabay-an ang iya resposibilidad sa barko.
Bangud sa iya nga trabaho, natun-an niya nga mangin mabakod kag ma-balanse ang iya personal kag professional life.
Samtang para kay Juliee Mee Soliman Torculas, wala niya ginakonsidera nga stressful ang iya trabaho.
Suno kay Torculas, sadto sa iya pagdumdom, gina-bully ang mga kababaihan sa sulod sang barko apang ginkakibot niya nga sang siya ang nagsakay kag nakatrabaho sa cruise ship, tuman gid ka safe ang iya nangin kahimatangan.
May yara pa pahayag niya sang mga gentlemen nga naga-assist sa mga babaye.
Dugang pa sang natungdan, madamo nga mga nationalities ang iya kaupod sa barko kag pinaagi sini, nahibaluan niya ang ila nagkalain-lain nga mga kultura.
May yara man sang mga mabug-at nga obra ang mga babaye nga seafarer.
Suno kay Naxa Divinagracia-Batiquin, nagahakwat man sila sang kinarton nga mga food supplies sa barko.
Apang kun kaisa, may yara man sang mga lalaki nga kaupod niya nga nagabulig sa mga babaye.
Sa barko pahayag ni Batiquin, tuman man ka importante ang time management bangud ang iya lang kaugalingo ang iya pwede nga masaligan
Sa subong, ang mga seafarers ang isa sa mga ginatangla bilang bag-o man nga baganihan sang pungsod nga nagahatag sang remittances halin sa dolyar nga ila matipon.
Ini nga mga remittances ang nagabulig sa domestic consumption kag mayor nga rason sa pagpasangkad sang ekonomiya sang Pilipinas.
Bilang isa ka seafarer, indi lamang sila baganihan para sa ila kaugalingon ukon sa ila pamilya kundi baganihan para sa bilog nga pungsod.
