ILOILO CITY- Ginpakigbahin sang Ilonggo muay thai champion kag 31st South East Asian (SEA) Games gold medalist nga si Philip Delarmino ang mas madalom nga inspirasyon sa likod sang iya kadalag-an.
Sa interview sang Bombo Radyo kay Delarmino nga tumandok sang Brgy. Lakturan, Dumangas, Iloilo, iya ginpahayag nga magluwas sa iya pamilya, ang iya anak ang nagahatag gid sang pwersa kag motibasyon sa iya agud nga mangin isa ka maayo nga atleta kag tiglawas sang Pilipinas.
Gintuad sang 31- anyos nga martial artist nga halad niya ang iya mga away kag mga medalya para sa iya anak nga lalaki nga nagasuprir sang balatian sa tagipusuon.
Tuman naman ang pagpasalamat ni Delarmino nga magluwas sa suporta sang iya pamilya, dako man ang ginpakita nga suporta sang mga Ilonggo sa iya away.
Matandaan nga nadepensahan sang Dumangasanon martial artist ang iya titulo sa 31st SEA Games batok sa hometown bet nga si Nguyen Doan.
Una nga nalutos si Delarmino kay Nguyen sa controversial nga 2-1 decision pabor sa Vietnamese fighter apang nag-file sang appeal ang Muaythai Association of the Philippines agud nga lantawon liwat paagi sa pag-review ang away sang duha.
Didto nakit-an nga mas klaro kag madamo ang igo ni Delarmino kag kontra kay Nguyen rason nga ginbaliskad ang desisyon pabor sa Pinoy.
Ang duha ang nagkitaay man sa 2019 SEA Games nga ginhiwat sa Manila kon sa diin nagpangibabaw man ang Pinoy Muay Thai artist nga si Delarmino.
