ILOILO CITY- Liwat nga nagpaandam ang Securities and Exchange Commission batok sa mga online lenders nga nagapamahog kag nagapangharass sa ila borrowers.
Sa interview sang Bombo Radyo kay Atty. Russel Ildesa,Director sang SEC Region 6, iya ginpahayag nga may yara na sila sang nabaton nga formal complaint batok sa mga online lenders nga nagalapas na sa right to privacy sang ila mga kustomer.
Suno kay Atty. Ildesa, ginapalab-ot gid sa mga online lending operators nga ang ila abusive collection practices nga naga- constitute sang unfair debt collection practices ang hugot nga ginadumilian sa SEC Memorandum Circular No. 18, series of 2019.
Nag-abiso man ini sa publiko batok sa online lending operators nga nagatanyag sang pautang sa publiko apisar wala sang valid certificate of incorporation kag certificate of authority to operate bilang isa ka financing company.
Nasaad sa Section 4 sang Republic Act 9474 ukon ang Lending Company Regulation Act of 2007 nga required nga ang lending company ang i-establisar lang bilang isa ka korporasyon kag wala sang lending company ang mahimo mag-conduct sang negosyo magluwas lang kun hatagan sang authority to operate sang SEC.
Ang Section 12 sang amo nga layi nagasilot naman sa sin-o man nga tawo nga naga- engage sa pagpautang nga wala sang authority to operate gikan sa SEC kun sa diin ang multa ang naga-range halin sa PHP10,000 pasaka sa PHP50,000 ukon pagkapreso nga anom ka bulan tubtob 10 ka tuig.
Suno kay Ildesa, sa subong, may yara na sang anom ka complaints ang nabaton ang komisyon angot sa nagapang-harass nga online lenders.
Nagpanugyan man ini sa publiko nga may reklamo batok sa mga online lenders nga magfile sang complaint sa komisyon.
Sang damlag lang,walo ka online lending operators ang ginpauntat sang SEC Central Office sang ila lending activities bangud wala ang mga ini sang nagakaigo nga lisensya.
Ini nga online lenders ang ginalakipan sang CashWill, PesoBee, Peso T-Safe Online Cash, RushLoan, SkyMart, SpendCash, Tapa, kag WithU.
