ILOILO CITY – Nag-file sang isa ka hagna si Senator Raffy Tulfo nga naga-amyendar sang holiday economics law agud nga mapahanugutan ang long weekends nga makapasanyog sang domestic tourism kag maka-promote sang work-life balance.
Sa idalom sang Senate Bill No. 1651, kun ang holiday ang natu-on sa Sabado ukon Domingo, ini ang i-observe sa masunod nga Lunes.
Suno kay Tulfo, ang Pilipinas ang nagaselebrar sang 18 ka mga national holidays sa tagsa ka tuig kun sa diin, apat diri ang makabig nga ‘special non-working holidays.’
Ang ini nga mga adlaw ang kun kaisa, natuon sa weekend gani, indi maselebrar sang maayo.
Dugang pa niya, ang ginaduso nga hagna ang mangin beneficial sa mga empleyado kag mga estudyante agud nga maka “decompress” kag malikawan ang burnout.
Nahibaluan nga ang holiday economics ang isa ka practice sa idalom sang administrasyon ni anay President Gloria Macapagal-Arroyo kun sa diin, ang regular kag special holidays ang ginasaylo sa adlaw nga malapit sa Lunes agud nga mapabaskog ang domestic tourism.
Sang damlag lang, nagpagwa si President Ferdinand Marcos, Jr. sang bag-o nga proklamasyon nga nagabag-o sang listahan sang regular holidays kag nagadugang sang special non-working day sa 2023.
Sang ginpirmahan ni Marcos ang Proclamation No. 90, iya ginpahayag nga kinahanglan nga sundon ang principle of economics pinaagi sa pagpatuman sang mas malawig nga weekend nga makabulig agud nga ma-encourage ang domestic travel kag madugangan ang tourism expenditures sa pungsod.
