Nag-file si Senate Minority Leader Vicente “Tito” Sotto III sang hagna nga nagatuyo nga ipatuman ang polisa para sa mas bukas kag transparent nga transaksyon sang gobyerno, ilabi na sa mga isyu nga may kaangtanan sa interes sang publiko.
Ang gina-propose nga “People’s Freedom of Information Act of 2025” nagatuyo nga kilalahon ang kinamatarong sang publiko nga makabalo sa mga impormasyon nga may kahilabtanan sa pang-gobyernohan nga proseso kag proyekto.
Ginamandu sang amo nga hagna ang pagsapubliko nga pagpagwa sang mga kritikal nga impormasyon, lakip na ang tuigan nga Statement of Assets, Liabilities, and Net Worth (SALN) sang mga masunod: Presidente, Bise Presidente, Mga Cabinet Secretaries, Mga myembro sang Kongreso, Mga mahistrado sang Supreme Court, Mga opisyal sang Constitutional Commissions kag iban pa nga ahensya nga ginakabig nga constitutional offices, kag mga opisyal sang Armed Forces nga may General ukon Flag Ranks.
Ginamando man sang hagna nga ang tanan nga ahensya sang gobyerno dapat mag-upload sang importante nga impormasyon sa ila tagsa ka opisyal nga website agud mas madali ini ma-access sang publiko.
