ILOILO CITY – Ginahanda na sang Senate Committee on Public Services ang report sa SIM Card Registration Bill.
Suno kay Senator Grace Poe, chairman sang amo nga komitiba, prayoridad subong nga ma-report ang SIM card registration.
Sang Hulyo, gin-file ni Poe ang SIM Card Registration Bill nga una na nga gin-veto ni anay President Rodrigo Duterte.
Sa idalom sang amo nga bill, ang mga public telecommunications entities ang dapat nga maga-require sa mga SIM cards nga i-register bilang prerequisite sa pagbaligya kag activation.
Ang tanan nga social media account providers ang maga-require man nga magdeklarar sang ila matuod nga pangalan kag numero sa ila paghimo sang account.
Suno kay Poe, ang registration sang mga SIM cards ang mangin solusyon sa pagdamo sang mga scammers.
Samtang, ang nasambit nga komitiba ang magabukas man sang isa ka inquiry agud nga hambalan ang proseso sang National Telecommunications Commission kag iban pa nga mga ahensya.
Dugang pa ni Poe, ang mga government agencies, stakeholders, kag telecommunication companies ang nagpahayag na sang pagsuporta sa ginaduso nga hagna agud nga matapna ang mga text scams.
