Indi mapunggan sang pila ka labor groups nga mapa-“sana all” sa one-time inflation assistance nga ihatag sa mga empleyado sa senado nga lab-ot sa P50,000.
Kahapon sang gin-anunsyo ni Senate President Juan Miguel Zubiri nga halin sa P12,000, himuon nga P50,000 ang inflation allowance sang ginabanta 3,000 ka staff sa Senado.
Ihatag ini nga ayuda sa bulan sang Agusto.
Gin-anunsyo man sang Senate president nga hatagan man ang mga empleyado sang dugang nga P20,000 sa medical incentives sa September, buot silingon, ang kinaandan nga P30,000, mahimo naman nga P50,000.
Ginpahayag ni Zubiri nga ini nga maalwan nga increase sa benepisyo amo kuntani ang mangin ehemplo sa tanan nga government offices kag ahensya agud nga ma-motivate man ang mga empleyado nga mag-trabaho.
Sa bahin sang labor groups, nagahingyo ang Trade Union Congress of the Philippines sang emergency cost of living allowance para sa minimum wage earners. Matandaan nga sang nagligad nga tuig, may petisyon man sa National Capital Region Tripartite Wages and Productivity Board para sa P100 nga saka sa minimum wage.
Ginpasalig naman sang Department of Labor and Employment (DOLE) nga ginapang-proseso na ini nga mga petisyon. ##
