Patigayunon subong nga adlaw, Marso 5, ang ika-apat na nga hearing sang Senado kaangot sa gina-alegar tinuig nga pagpang-abuso nga nahimo ni Kingdom of Jesus Christ founder kag leader Pastor Apollo Quiboloy.
Dayunon ini nga hearing kag padayon nga bukaron ang mga alegasyon sa self-proclaimed Appointed Son of God “in aid of legislation.”
Suno kay Senator Risa Hontiveros, chairperson sang Senate Committee on Women, Children, Family Relations and Gender Equality, siguruhon sang komitiba nga ini nga mga hearing ang magaresulta sa mas mabaskog nga mga layi para sa kababainhan, kabataan, kag kutob sa mga vulnerable sa sini nga pag-abuso.
Indi gihapon maathag kun sa diin si Quiboloy subong apang una sini ginkumpirma nga nagapanago siya bangud sa pamahog sa iya nga kabuhi.
Una man nga ginsiling ni Hontiveros nga pananglitan indi gihapon magtambong si Quiboloy sa hearing bisan pa nga gin-subpoena siya, ipa-contempt niya ini kag ipa-aresto.
Kahapon, Marso 4, nagmandu man ang Department of Justice sa pagpasaka sang kaso nga child abuse kag human trafficking batok kay Quiboloy — tikang nga ginpasalamatan ni Hontiveros.
Nalakip sa mandu sang DOJ amo ang kaso batok kay Quiboloy kag sa iya associates nga sanday Jackielyn Roy, Cresente Canada, Paulene Canada, Ingrid Canada, kag Sylvia Cemanes bangud sa child abuse, cruelty, ukon exploitation.
Ang prosecutors naman sa Pasig City ang ginsugo nga magkaso kay Quiboloy kag sa lima ka iban pa nga respondents bangud sa violation sang Anti-Trafficking in Persons Act.#
