ILOILO CITY – Gilayon nga gindala sa ospital ang wala pa makilal-an nga lalaki matapos nabungguan sang isa ka Jaro-CPU nga jeep sa Brgy. Ma. Christina, Jaro, Iloilo City subong nga hapon, Pebrero 15.
Ang amo nga biktima ang nagasuksok sang green nga shorts kag striped shirt nga duag green.
Sang gin-usisa sang kapulisan, nakit-an ang resita sang bulong nga yara sa iya bulsa kag ini ang nakapangalan kay Felix Gabiola.
Indi pa makumpirma sang kapulisan kun ang amo nga biktima ang nagapang-iya sang resibo kag kun siya si Gabiola.
Sa interview sang Bombo Radyo kay Dioscoro Dogena Jr., isa sa mga nakasaksi sa aksidente, iya ginpahayag nga daw kaangay nga ‘ginlumpatan gid sang biktima ang jeep’.
Suno kay Dogena, ginkakibot lang nila nga apisar ginatulok na sang lalaki ang nasambit nga jeep, naghingagaw gid ini sa pagtabok.
Amat-amat suno sa iya ang pagkatumba sang biktima bangud naka-uyat pa ini sa hood sang jeep.
Padayon pa ang imbestigasyon sang kapulisan.
