Shabu nga ginsulod sa balunan sang kan-on kag tuyo i-deliver sa isa ka preso, nadakpan sang mga kapulisan

Nalaskaran ang plano sang mga abyan sang ginapahayag “source” sang maglive-in partner nga si alyas Badoy kag Tami Muya, matapos nga nadakpan ang mga ini nga nagdul-ong sang shabu sa presuhan.

Nahibaluan nga nadakpan man sa isa ka drug buy bust operation sang La Paz PNP ang mag-live-in partner nga una man gintudlo sang pamilya Provido nga source sang illegal nga droga ni Johnny Provido nga isa sa apat ka nagkalamatay sa stabbing incident sang gintalikdan nga Marso 21 sa Brgy. San Isidro, La Paz.

Sa interview sang Bombo Radyo kay PCPT Gimel Acuesta, hepe sang Iloilo City Police Station 2, iya ginpahayag nga sa pagbisita sang mga abyan sang ginapahayag source ni Alyas Badoy sa presuhan, didto kag natukiban sang mga kapulisan nga may ready to use nga shabu nga natakpan sang kan-on kag nasulod sa isa ka plasticware.

Suno pa kay Acuesta nga madamo sang koneksyon si Tami Muya sa dalagkuan nga mga drug personality sa Metro Manila kun sa diin didto man sini ginakuha ang iban niya nga supply sang illegal drugs.

Ululupod sa karon sa prisohan sang ICPS 2 ang tanan nga nadakpan nga mga drug subject lakip na si Tami Muya kag alyas Badong.