Ginpangayo ang bulig sang mga kaparian agud nga matapna ang mga nagapanguna nga problema sa mga eskwelahan sa pungsod nga amo ang nagatuga sang krisis sa edukasyon.
Kabahin ini sang na-istoryahan sa 42nd National Social Action General Assembly (NASAGA) 2026 sang Caritas Philippines sa Tagaytay City. Ini nga pagtilipon ang gina-updan sang mga obispo, clergy, kag social action workers agud nga makatutok sa misyon sang simbahan para sa social justice kag iban pa nga isyu kaangay sang kalinong.
Ang isa sa resource persons amo ang Executive Director sang Second Congressional Commission on Education (EDCOM 2).
Suno kay Msgr. Meliton Oso, director sang Jaro Archdiocesan Social Action Center (JASAC), nagtutok ang EDCOM 2 sa makatulublag nga reports kaangot sa epekto sang mass promotion, malnutrisyon, kag bullying sa mga kabataan.
Sa mass promotion, ginapasaka sa masunod nga grade level ang mga estudyante sa mga pampubliko nga eskwelahan apisar nga kulang sa kapasidad kag kaalam.
Sa bullying, ginsulit ni Oso ang report sang EDCOM 2 kag data sang international assessments nga nag-resulta sa pagbansag sa Pilipinas bilang “bullying capital of the world”
Sa malnutrisyon, ginplastar man sini ang datos kun sa diin indi husto ang preparasyon ukon kakulang sang pagkaon nga may malain nga epekto sa ikaayong-lawas sang kabataan.
Gin-cite man sini ang pagtuon sang UNICEF paagi sa World Vision PH nga 95 ka mga Pilipino ang nagakapatay kada adlaw bangud sang malnutrisyon.
Suno kay Oso, ginbaton sang kaparian ang hangkat sang EDCOM 2 nga buligan sila nga ma-address ini nga isyu paagi sa pagbulig sa feeding program kag library para sa kabataan.
Nagpanawagan man ini sa mga nutritionist nga mag-volunteer sa feeding program kag library program nga plano sang JASAC.
Una naman nga nagpahayag ang Department of Education (DepEd) nga pasangkaron pa sini ang partnership sini sa simbahan kag sa civil society organizations para sa de-kalidad nga edukasyon para sa tanan nga mga Pilipino nga kabataan.#
Photo: Caritas Philippines
