ILOILO – Padayon nga nagataas ang numero sang mga nagahikog.
Nahibaluan nga humalin sang Enero tubtob Agosto subong nga tuig, may yara na sang 60 ka recorded incident sa probinsya sang Iloilo.
Sa interview sang Bombo Radyo kay Sister Ma. Cerafica Tolentino sang Dominican Sisters, iya ginpahayag nga dako ang papel sang mga ginikanan sa mental health sang isa ka bata.
Suno kay Tolentino, nagakadapat nga bantayan sang mga ginikanan ang ila tagsa ka mga bata kag hatagan sang madamo nga atensyon bangud ini ang isa ka epektibo nga pamaagi agud malikawan ang suicidal thoughts sa mga kabataan.
Ginpahayag ni Tolentino nga may impluwensya man ang mga abyan nga gina-updan sang mga kabataan.
Sa pihak sini, ginpahayag ni Tolentino nga ang hugot nga pagtuo ang pinaka-importante sa tanan bangud paagi sa pagtuo sa Ginuo, mas mahibaluan ang importansya sang kabuhi.
May yara man sang Peer facilitators sa mga barangay lakip man sa mga eskwelahan agud mas mahatagan sang atensyon kag importansya ang mental health sang mga kabataan.
