ILOILO CITY- Balik na sa normal ang sitwasyon sa banwa sang San Remegio, Antique matapos ang engkwentro sang gintingob nga pwersa sang Antique Mobile Force Company upod ang San Remigio Municipal Police Station batok sa ginapasuni mga miyembro sang Communist Terrorist Group sa Sitio Gahit, Barangay Aningalan sa amo nga banwa.
Matandaan nga ang engkwentro ang natabo sang Disyembre 11 kun sa diin ginapahayag 16 ka mga katapo sang rebelde ang naka-engkwentro sang kapulisan.
Sa interview sang Bombo Radyo kay Mayor Margarito Canja Mission Jr. sang San Remegio, Antique, iya ginpahayag nga nag- anunsyo ini sang Domingo nga igasuspende anay ang klase sa nasambit nga banwa kag sang nakontrol na ang sitwasyon, ginpabalik man sang alkalde ang mga klase umpisa kahapon.
Suno sa natungdan, wala naman sang pagpamahog ukon untoward incident nga natabo matapos sang nagluntad nga engkwentro.
Samtang, nagpangbilin naman sang ila leaflets kag vandal marks sa greenhouse project ang rebelde nga grupo.
Matapos naman sang sanitation kag clearing operation sang militar sa nasambit nga lugar, may nakit-an nga improvised explosive device.
Nahibaluan nga sa maabot nga Disyembre 26 ang ika 54 nga anibersaryo sang Communist Party of the Philippines.
Ginpahayag man ni Mayor Mission nga may naka-deploy na nga Civilian Armed Forces Geographical Units kag Philippine National Police agud mas mapahugot pa ang seguridad sa banwa.
Bukas naman sa mga pumuluyo ang banwa sang San Remegio bangud nga kontrolado sang otoridad ang sitwasyon.
