ILOILO CITY – Nagpanindugan si Solicitor General Menardo Guevarra nga ang war on drugs ang indi makabig nga crime against humanity kundi isa ka lehitimo nga law enforcement operation nga nag-target sa paglapta sang illegal nga droga apang may yara lang sang mga nagkalamatay.
Suno sa iya, wala nagakabagay nga ipa-anggid ini sa mga war crimes kag genocides.
Sang ginpamangkot naman sa kumpirmado nga numero sang illegal drug-related deaths kag kun sin-o ang responsable sa pagpamatay, ginpahayag ni Guevarra nga may yara sang official figure nga nagikan sa mga kapulisan nga amo ang una nga mas nakahibalo.
Sa data sang otoridad, masobra sa 6, 000 ang numero sang mga nagkalamatay gani wala ginpanginwala ni Guevarra nga madamo ang nagkalamatay.
Dugang pa niya, 80% sang drug-death cases ang indi na maproseso bangud sa kakulang sang testimoniya kag witnesses.
Pahayag niya dugang, mangin ang mga pamilya sang biktima ang wala naga-kooperar.
Gin-enganyo niya ang mga ini nga magsalig sa gobyerno agud nga mahatagan sila sang hustisya.
Nagpasalig man ini nga magahatag ang gobyerno sang proteksyon.
Gin-ako man niya nga ang imbestigasyon sa drug-related deaths ang mabudlay bangud sa institutional constraints kaangay sang kakulang sa pondo kag personnel.
Apang suno sa iya, ini nga mga kabudlayan ang indi rason agud nga magpangayo sang bulig nagikan sa iban nga institution agud nga mag-take over sang imbestigasyon.
May kaangtanan naman sa apelar sang Pilipinas batuk sa pagbalik sang imbestigasyon sang International Criminal Court Prosecutor’s Office sa drug war killings, ginpahayag ni Guevarra nga nagapabilin ini nga aktibo.
Sang nagligad nga semana, ginpahayag ni Presidente Ferdinand “Bongbong” Marcos, Jr. nga ang apelar sang pungsod ang gin-dismiss.
Suno kay Guevarra, sa masunod pa nga semana i-file sang International Criminal Court Prosecutor ang sabat sa appeal brief gani makabig pa ini sa gihapon nga pending.
Ginpaathag niya nga gin-post na online sang Appeals Chamber ang ila nga ruling antes pa man ginpadala sa Philippine government ang official notification.
