ILOILO CITY- Halos nagapangampo na ang mga mangunguma sa Dumangas, Iloilo bangud kaangay nga indi na gid sila makabawi sang ila kapital sa ila mga produkto nga ulutanon.
Sa interview sang Bombo Radyo kay Danny Dueñas, isa ka mangunguma sa Pagdugue, Dumangas, iya ginpahayag nga tuman ang kabudlay nga ila naeksperyensiyahan bilang mangunguma bangud sa mahal nga abono kag problema sa tubig bangud sa naguba nga irigasyon sa ila lugar,apang kaangay nga ginadingutan pa sila nga makabawi-bawi man lang sa ila kita.
Suno kay Dueñas, ini ang rason kun ngaa napilitan na lang ini nga pangtumpukon sa higad sang dalan ang iya mga ulutanon agud makaganyat sa mga motorista nga magbakal kun sa diin ginhungod nalang niya nga panubuan ang presyo para lang nga mabakal ini sa baylo nga madunot.
Suno sa iya, luyag man niya kuntani nga makaginansya man sang dako apang kun pataasan niya ang presyo, pat-ud nga magkaladunot lang ang mga ini kag indi na mapuslan bangud wala sang may magabakal.
Nagalaum naman si Dueñas nga magdamo ang ila mga bumalakal ilabi na nga may ginaswelduhan man siya nga mga tinawo nga nagabulig sa iya sa uma kag sa pagbaligya.
