ILOILO CITY – Ginakabig na nga pinakamabaskog nga bagyo sa bilog nga kalibutan subong nga tuig ang Super Typhoon Hinnamnor nga ginalauman nga magasulod sa Philippine Area of Responsibility bwas ukon sa Huwebes kag nagabaskog pa sa nasidlangan nga bahin sang Ryukyu Islands sang Japan.
Ang maximum sustained winds ang nagtaas pa tubtob sa 195 km/h nagikan sa 185 km/h kag may pagmadlos tubtob sa 240 km/h nagikan sa 230 km/h.
Ini ang gina-forecast nga malab-ot ang pinakamataas nga intensity nga 205 km/h subong nga adlaw antes i-downgrade sa typhoon status sa Byernes.
Ulihi ini nga nakita sa 1,305 kilometers nasidlangan-nakatungdan sang extreme Northern Luzon kag nagahulag padulong sa nakatundan-nabagtanan-nakatungdan tubtob 30 km/h.
Ang kadasigon ni Hinnamnor ang nagapabilin nga mabaskog apang suno sa PAGASA, magasugod ini sa paghina subong nga aga.
Gina-project ini nga magasulod sa PAR karon sa gab-i ukon bwas sa aga.
Tawgon ini nga Henry sa tion nga magsulod ini sa PAR.
Kaangay ni Gardo, si Hinnamnor ang wala ginalauman nga magatupa sa Pilipinas.
Apang suno sa PAGASA, ang tropical cyclone wind signals ang ipasaka sa extreme Northern Luzon.
Nagpaandam man ang weather bureau nga may yara sang light to heavy rain halin sa outermost rainbands sang super typhoon nga mahimo nga mag-apekto sa extreme Northern Luzon nga magasugod sa Huwebes ukon sa Byernes.
Sa sini nga tion, magapabilin si Hinnamnor nga stationary ukon wala nagahulag.
Dugang pa sang PAGASA, ang super typhoon ang mahimo nga magpabaskog sang southwest monsoon ukon hanging habagat nga magadala sang monsoon rain sa nakatundan nga bahin sang Luzon nga magasugod sa Byernes.
Ini man ang mahimo nga halinan sang pagbalod sa kadagatan sa northern kag eastern seaboards sang Luzon nga magasugod sa Huwebes ukon sa aga sang Byernes nga delikado para sa mga magagmay nga vessels.
Ang super typhoon ang mahimo nga magbiya sa Pilipinas sa Sabado sang gab-i.
Samtang, napabilin naman sang Tropical Depression Gardo ang kabaskugon sa Philippine Sea.
Suno sa Philippine Atmospheric, Geophysical, and Astronomical Services Administration (PAGASA), si Gardo ang may yara sang maximum sustained winds nga 55 kilometers per hour kag pagmadlos nga tubtob sa 70 km/h.
Ang tropical depression ang ulihi nga nakita sa 1,125 kilometers sang nasidlangan sang extreme Northern Luzon kag nagahulag sa nakatundan-nabagatnan-nasidlangan kag nagahinay sang 10 km/h nagikan sa 15 km/h.
Magapabilin ini nga malayo sa Philippine landmass kag ini ang ginapanan-aw nga magapadulong sa naaminhan ukon sa naaminhan sang naaminhan-nakatundan samtang naga-interact sa super typhoon Hinnamnor.
Suno pa sa PAGASA, magabaskog pa tubtob sa tropical storm si Gardo subong nga aga apang pagkatapos sina, magahina ini kag karon sa hapon ukon sa gab-i, lamunon ini ni Hinnamnor.
