ILOILO – Limitado ang suplay sang dugo sa Philippine Red Cross bangud sang pagpatuman sang enhanced community quarantine sa syudad kag probinsya sang Iloilo.
Sa interview sang Bombo Radyo kay Dr. Dennis Roy Pasadilla, Regional Blood Center manager sang Philippine Red Cross, iya ginpahayag nga indi na makadali-dali sa pagdonar ang mga tawo sang dugo bangud kulang man ang transportasyon nga mahimo magamit, ginalikawan ang mass gatherings, kag ginapaidalom ang tanan sa home quarantine.
Suno kay Pasadilla, ginatilawan man nila sa subong nga mag-tap sa local government unit kag gina-isa isa ang mga ini paagi sa paghimo sang community blood donation sa mga gym.
Ginapatigayon ang amo nga aktibidad samtang ginatuman ang physical distancing.
Apisar sini, ginpahayag ni Pasadilla nga kulang sa gihapon ang responde sang blood donors.
Ginakahangaw-an nga samtang nagadugay, amat-amat pa gid nga maubos ang suplay kag posible nga wala na sang magamit sa tion sang emerhensya.
Bangud sini, nagpanawagan ang natungdan sa mga tawo nga nagakinahanglan sang dugo — kun mahimo, magdala sang kaugalingon nga blood donor.
Para naman sa mga may kaugalingon nga salakyan, pahayag ni Pasadilla, mahimo sila nga makapadulong sa opisina sang Philippine Red Cross para sa individual donation.
Bukas ang nasambit nga pamunuan halin ‘las otso tubtob ‘las onse sa aga, kag ‘la una tubtob ‘las kuatro sa hapon.
