ILOILO CITY – Nagsungka sa kapulisan ang suspek nga nag martilyo patay sa 13-anyos nga biktima sa Brgy. Casalsagan, Pototan, Iloilo.
Ang 13-anyos nga bata ang nasapwan nga patay sang Martes, Marso 29.
Ang suspek amo si Alyas Dodoy, 16 anyos sang amo man nga lugar.
Sa interview sang Bombo Radyo kay Raul Pachejo Sr., amay sang biktima, ang suspek ang suod nga abyan gid lamang sang biktima kag masami nga yara man sa ila nga balay.
Ginapahayag dugang sang amay nga gin-ako mismo sang suspek nga siya ang nagpatay.
Si Alyas Dodoy ang ginaduha-duhaan na nga daan nga amo ang masami nga nagapangawat sang ginansiya sang computer shop.
Suno kay Pachejo, posible nga nadakpan sang biktima si Alyas Dodoy nga amo ang nagapangawat kag ginpahog ini nga isugid sa amay.
Maghimo nga nagsala si Alyas Dodoy kag gin-martilyo ang biktima.
Sa subong, yara na sa kustodiya sang Women and Children Protection Desk (WCPD) si Alyas Dodoy.
