ILOILO – Wala pa sa gihapon napasakaan ang kaso ang suspek nga nagluthang-patay sa manugbantay sang pantatan sa Sitio Bulod 2 Barangay Pulao, Dumangas, Iloilo.
Ang biktima amo si Jomarie Torres, 32, residente sang Barangay Cabilauan, Barotac Nuevo, Iloilo.
Sa interview sang Bombo Radyo kay Police Major Kenn Albert Lepsia, hepe sang Dumangas Municipal Police Station, iya ginpahayag nga yara pa sa kasubo ang pamilya sang biktima rason nga wala pa ang mga ini nakapasaka sang kaso.
Suno kay Lepsia, isa pa lang ang ila witness sa kaso nga makabulig sa pagsolbar sa krimen.
Matandaan nga gintuad sang mga residente sa lugar nga may nabatian sila nga lupok sang ‘las 11 sang gab-i sang Pebrero 9, apang hapon na sang Pebrero 10 nakit-an ang lawas sini sang nagbisita ang utod sang tag-iya sang pantatan.
Nahibaluan nga nag-inom-inom pa ang biktima sa balay sang tag-iya sang pantatan nga ginabulubanta 300 metros ang kalayuon sa payag inoras antes nagluntad ang insidente.
Walo ka gunshot wounds ang naagum sang biktima nga igo sang 12 gauge shot gun.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
