𝗜𝗟𝗢𝗜𝗟𝗢 – Padayon pa ang imbestigasyon sang mga otoridad sa natabo nga pagluthang-patay sa manug-bantay sang pantatan sa Sitio Bulod 2 Barangay Pulao, Dumangas, Iloilo.
Ang biktima amo si Jomarie Torres, 32, residente sang Barangay Cabilauan, Barotac Nuevo, Iloilo.
Sa interview sang Bombo Radyo kay Police Master Sergeant Jhon Mark Tuazon, imbestigador sang Dumangas Municipal Police Station, iya ginpahayag nga tatlo ka bulan na nga nagatinir ang biktima sa nasambit nga lugar.
Suno kay Tuazon, nag inom-inom pa ang biktima sa balay sang tag-iya sang pantatan nga ginabulubanta 300 metros ang kalayuon sa payag inoras antes nagluntad ang insidente.
Suno sa mga residente, may nabatian sila nga lupok sang ‘las 11 sang gab-i sang Pebrero 9, apang hapon na sang Pebrero 10 nakit-an ang lawas sini sang nagbisita ang utod sang tag-iya sang pantatan.
Ginabulubanta walo ka gunshot wounds ang naagum sang biktima nga possible igo sang 12 gauge shot gun.
Sa subong, padayon pa nga ginapangita ang suspek sa krimen.
- – 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
