ILOILO CITY – Nagpanindugan si suspended Negros Oriental 3rd District Representative Arnulfo Teves, Jr. nga mapauli lamang ini sa tion nga may makit-an na siya nga gamay nga senyales sang fairness sa ginapatigayon nga imbestigasyon sang gobyerno sa kamatayon ni former governor Roel Degamo.
Si Teves ang ginakabig nga isa sa mga masterminds sa krimen.
Sa exclusive interview sang Bombo Radyo Philippines kay Teves, iya ginpahayag nga delikado para sa iya nga magpauli sa pungsod kun magapadayon nga indi patas ang imbestigasyon.
Dugang pa niya, sa ginapatigayon nga imbestigasyon, daw kaangay nga ginatumod na nga siya ang may sala.
Suno kay Teves, dapat nga imbestigaran man ang tanan nga anggulo.
Pahayag niya dugang, dapat nga may yara anay sang ebidensya antes ang conclusion apang baliskad ang nagakatabo.
Samtang, ginkwestiyon man niya ang paggamit sang tinaga nga “surrender”.
Ini ang may kaangtanan sa pahayag ni Justice Secretary Jesus Crispin Remulla nga may nabaton na ini impormasyon nga maga-surrender na si Teves.
Suno kay Teves, ang may sala nga tawo lamang ang naga-surrender.
Ginpahayag man ni Teves nga nahibaluan niya nga ipapatay siya sa tion nga magbalik sa pungsod.
Sa tion nga mapatay siya, maganami ang pangalan sang wala niya ginhingadlan nga opisyal samtang makaluluoy naman ang iya mga pamilya kag ang mga nagasalig sa iya.
May kaangtanan naman sa pahayag ni Remulla nga kabigon ini nga terorista, suno kay Teves, dapat anay nga balikan sang Department of Justice ang layi.
Sa tion nga iduso gid ini sang ahensya, wala na siya sang may mahimo bangud nga daw kaangay nga puno sang gahum ang iban nga opisyal sang gobyerno.
Nagpanawagan man ini kay Presidente Ferdinand Marcos, Jr. nga indi magpati sa kay kun sin-o lang kag dapat nga yara lamang sa tunga sa tanan nga tion.
Gin-athag ni Teves nga wala sila sang away nanday Justice Secretary Remulla kag Interior Secretary Abalos.
Suno kay Teves, mag-abyanay sila ni Remulla samtang, makapila lamang sila ka beses nga nagkitaay ni Abalos.
Ginkatingala man sini kun ngaa nga siya ang nagabutan sa “raffle” upod kay former Bureau of Corrections chief Gerald Bantag nga sa subong, gina-ayam sang otoridad bangud sa kaso nga pagpatay sa broadcaster nga si Percy Lapid kag sa alleged middleman nga si Jun Villamor.
Samtang, nagpasalamat naman si Teves sa tanan niya nga mga constituents sa Negros Oriental nga nagsuporta kag padayon nga nagasuporta sa iya.
Ginpahayag niya nga padayon sa gihapon ang iya paghatag sang bulig indi lang sa Negros Oriental kundi mangin sa bilog nga pungsod apisar nga suspendido ini subong sa House of Representatives.
