GUIMARAS – Ginahingyo ni Guimaras Governor Samuel Gumarin ang tagreklamo sa ginapahayag “malpractice” sang isa ka doktor sa Buenavista Emergency Hospital sa Buenavista, Guimaras nga magsulat sang pormal nga reklamo.
Suno kay Gumarin, mabudlay ang pagpatigayon sang imbestigasyon kun “huring-huring” lang ang pagabasehan.
Suno kay Gumarin, indi dapat magkahadlok ang tagreklamo bangud nga katuyu-an sini nga matadlong ang sala nga ginabuhat sang doktor sa Buenavista Emergency Hospital.
Indi kumpleto ang serbisyo sang nasambit nga hospital suno kay Gumarin ipanggid sa iban nga hospital nga may yara sang surgery, pediatrics, internal medicine kag obstetrics, apang iya ginpasalig nga wala ginapabay-an sang Guimaras Provincial Government ang responsibildad sa pagdumala sa nasambit nga hospital.
Natigayon naman nga maistorya ni Gumarin ang chief sang hospital agud madiskusyunan ang nangin kabangdanan sang problema.
Nahibaluan nga nagpadangat sang reklamo sa Bombo Radyo ang himata sang duha ka pasyente nga ginapahayag wala natatapan bangud sang “malpractice” sang doktor sa nasambit nga hospital.
