Tatlo ka pulis, masobra sa duha ka NPA, pilason sa engkwentro sa Leon, Iloilo

ILOILO CITY–Tatlo ka mga pulis ang pilason sa paglupok sang landmine nga nagresulta sa engkwentro sa tunga sang tropa sang gobyerno kag New People’s Army (NPA) sa Brgy Carolina , Leon Iloilo.
Ang mga pilason amo sanday  Police Chief Inspector Abner Jordan nga platoon leader sang 1st Platoon sang 601st Company,  PO2 Rosenie Lebuna kag PO1 Mark Ringgo Fernando.
Sa interview sang Bombo Radyo kay Police Chief Inspector Abner Jordan, iya ginpahayag nga nagapatigayon sila sang combat patrol sa lugar matapos nga mabaton ang impormasyon nga may yara sang presensya sang NPA sa lugar.
Pag-abot sang mga kapulisan sa boundary sang Brgy Isian, hinali lang nga naglupok ang landmine kag naigo sila nanday Lebuna kag Fernando.
Pilas sa tuo nga bahin sang nawong kag tuo nga bahin sang liog ang naangkon ni Jordan samtang daplis naman sa kamot ang naangkon ni Lebuna kag pilas sa wala nga paa ang nanagkon ni Fernando.
Gilayon naman nga ginpaarakan sang luthang sang mga pulis ang ginabanta 20 ka mga rebelde.
Indi magnubo sa duha ka mga katapo sang ginapatihan New People’s Army (NPA) ang ginapasuni nga napilasan sa natabo nga engkwentro sa Brgy Carolina Leon Iloilo.
Sa interview sang Bombo Radyo kay Police Senior Superintendent Marlon Tayaba, Director sang Iloilo Police Provincial Office, iya ginpahayag nga may duha ka mga pilason nga gina-agubay ang mga rebelde samtang nagapalayo sa lugar.
May nakakita man sang mga tinulo sang dugo ang kapulisan sa ginluntaran sang engkwentro.
Sunu kay Tayaba, gilayon nagpalagyo sa lugar ang mga rebelde padulong sa direksyon sang Tubungan, Iloilo.
Nagapasalamat naman ang IPPO Director sa mga pumuluyo  sa pagsugid sang nahibalu-an batok sa mga rebelde.
Nakita sa lugar ang isa ka .45 caliber pistol, nanari-sari nga bala, batteries, electrical wire kag iban pa nga ginagamit sa paghimo sang Imporvied Explosive Device (IED).