ILOILO – Pilason ang isa ka taxi driver matapos nga ginbuno sang isa sa apat niya ka pasahero nga lunsay menor de edad sa Brgy. Nabitasan, Lapaz Iloilo City.
Ang biktima ginkilala nga si Alfredo Sumbong sang Maasin, Iloilo.
Sa interview sang Bombo Radyo kay Sumbong, iya ginpahayag nga nagsakay ang apat ka menor de edad sa atubang sang Metro Iloilo Water District sa Bonifacio Drive, Iloilo City.
Suno kay Sumbong, nakibot lang siya sang ginbuno na siya sa likod sang iya nga liog sang isa niya ka pasahero.
Gilayon nga nagpalagyo ang mga suspek apang nadakpan ang tatlo sa apat ka menor de edad lakip na ang isa ka babayi sa ginpatigayon nga follow up operation sang Lapaz, Police Station.
Gintudlo naman sang duha ka upod niya nga mga lalaki si Alyas Rochelle nga amo ang nagbuno sa taxi Driver.
Suno kay Alyas Rochelle, wala sila sang inug plete rason kun ngaa ginbuno niya ang driver.
Sa subong yara na sa custody sang Lapaz Police Station ang mga menor de edad.
