Sa tunga sang mga akusasyon sa gina-alegar iya kahilabtanan sa Degamo assassination, opisyal na nga naghingyo si Negros Oriental 3rd district Rep. Arnolfo “Arnie” Teves Jr. sa Kamara nga hatagan siya sang duha ka bulan nga leave of absence.
Gin-address ni Teves ang iya request kay House Speaker Martin Romualdez nga amo ang una naman nagpanawagan sa iya nga magbalik na sa Pilipinas sa labing-madali nga tion.
Sa sulat sang mamalidha, gintumod sini nga rason ang “very grave security threat” sa iya kabuhi kag sa iya pamilya. Suno pa sa amo nga sulat, magabalik man gilayon sa si Teves kun na-address na sini ang pagpamahog sa iya kabuhi sa idalom sang layi sang Pilipinas kag sa bulig sang gobyerno.
Napetsahan nga Marso 9 ang sulat nga amo man ang tion nga nagpahayag ang House ethics and privileges panel sa Kamara nga hatagan si Teves sang lima ka adlaw agud nga mapaathag ang iya padayon nga pag-absent sa House proceedings.
Matandaan nga antes sini, ginhatagan siya sang travel authority bangud sa iya personal trip sa Estados Unidos sang Amerika apang nag-expire na ini sang Marso 9.
Ang ulihi nga pahayag ni Justice Secretary Boying Remulla amo nga yara na si Teves sa Asya.
Matandaan nga Marso 4 sang natabo ang pagpatay kay Governor Roel Degamo kag sa walo ka iban pa nga sibilyan sa Pamplona, Negros Oriental.
Isa sa mga gin-alegar suspek ang nagkanta nga si Teves ang mastermind. Una naman nagpahayag si Teves nga wala siya kag ang iya pamilya sang kahilabtanan sa amo nga krimen apisar sila ang nagasumpungunay sa pulitika sa amo nga probinsya. ##
